Mudimue dia matuku makumi Abidi ni inayi ngondo muisambombo, mateta à mbulamatadi akatuadija mu ditunga dijima dia Congo wa mungalata , tshikondo tshia mushinga mukole tshia tshidimu tshionso bua balongi ba tulasa tua bikadilu ne ba tulasa tua mudimu.
Tshibilu tshia dibanjija mukanda eu tshiakenzeka mu tshimenga tshia Kinshasa, mu bulombodi bua Judith Suminwa, Mukokeshi wa ditunga ne Raïssa Malu, ministre wa dilongesha dia ditunga ne wa bukua ditunga.
Mfumu wa mbulamatadi wa ditunga udi ujadikila bena mudimu badibu balombola ne: mbulamatadi udi mua kubambuluisha nansha mu miaba idi mvita anyi bipupu bienzeke. Bavua benze muabu muonso bua bana bonso ba mu tulasa tuonso babuele mu tshisangilu etshi.
Tuvua benze bionso bituvua mua kuenza bua provense wa Nord-Kivu ne ndi mutekemene ne bua bana betu bonso badi balue mu ndongoluelu wa ndekelu eu, ne tshisangilu etshi netshikale mu nsombelu muimpe menemene », ke mudiye muambe.
Kadi Raïssa Malu, ministre wa dilongesha dia ditunga ne dia buena ditunga, wakaleja mushinga udi nawu diteta edi kudi balongi badi mu mulongo wa ndekelu ne mêku abu, ne wakaleja dieyemena diende dia ne: balongi badi mua kutshimuna diteta edi.
Bua bantu bonso badi mu mpungilu eu, mbimpe bikale ne lutulu ne batumikile mikenji. Mu malu aa mudi: kuvuala tshilamba tshia mbulamatadi, karte ka dilongesha, ne dianyisha dia kubuela mu tshilongelu. Bidi kabidi ne mushinga bua tulasa tuonso tuikale tuenza malu ne budimu buonso bua kuepuka mishindu yonso ya dishima ne didinga. Udi wamba ne: bidi bitangila matuku atshilualua a bana betu ne bululame bua ndongeshilu wetu.
Bantu 962 887 bakabuela mu mateta aa, ne bakaji bavua ne bia pa lukama bipite pa 42 bakenza mateta aa munkatshi mua matuku anayi mu miaba 2960, kusangisha ne miaba idi ku mikalu.
Shekinah Gloire Kabongo
