Mokolo ya libwa ya sanza ya libwa, na kati ya bopemi na ye, mokonzi ya Séna, Jean-Michel Sama Lukonde, akobaki ba bokutani na ye na masanga ya ndenge na ndenge ya bato ya Grand Katanga. Ezalaki na ndaku ya Bukavu ya Pullman Grand Hôtel Karavia na Lubumbashi nde asololaki na balobeli ya etuka mpe ya ekolo ya eteni oyo ya mboka.
Masolo yango etali mingi mituna ya ntina oyo etali kobongisa bomoi ya bato ya mboka. Kati na mitungisi ya minene oyo balobeli ya bituka babimisaki ezalaki bopesi mayi, lotiliki, mpe kobongisa bitongeli ya kolongono mpe ya banzela, makambo ya ntina mpo na bolamu ya bibolo nionso.
Na balobeli ya ékolo, masolo etali mingi lolenge nkani ya kosala mpo na kotombola nkita ya Grand Katanga. Balobelaki mingi mingi bokiti ya mosala ya ba teritware nkama moko na ntuku minei na mitano (145), likambo ya lotiliki, oyo ezali na ntina mingi mpo na etuka ya mabanga ya ntalo, mpe lisusu botongi ya ba pont mpe ba barrage oyo ekotambwisaka lotiliki.
Balobeli mpe batelemaki na ntina ya kosala mibeko mpo na makambo ya sima ya botimoli mabanga ya ntalo. Bapesaki likanisi kosala ete nkita ya mboka ezala ndenge na ndengr na kokoba na ebolo ya tourisme na nguya, kobeti sete na bisika oyo bato bakoki kotala ebele oyo ezali nanu esalemi malamu te na eteni oyo ya mboka.
Na eyano, mokambi ya S ena alakisaki bondimi na ye ya kobatela boyokani ya libela na balobeli mpo na koluka ba mbano na mitungisi miye mibimisamaki. Akundolaki ete esengeli kotosa bopanzani ya misolo ya nkita, mpe ete ezali na ntina mingi kokabola misala ya barrage hydroélectrique na ndenge ya liboso.
Lisanga ya balobeli ya ékolo, na nzela ya mokambi na yango, kondo Mukasa, eyambaki mosala ya Sama Lukonde, akundoli ete ye moko azalaki molobeli ya ékolo ya kala mpe moko ya lisanga ya balobeli ya Haut-Katanga. Balakisaki botondi na bango mpo na bondimi na ye mpe bazongeli ntina ya boyokani kati na bandako mibale ya mbulamatari mpo na kobongisa makambo na etuka eye.
Bokutani boye bozali ntango ya ntina mpo na Jean-Michel Sama Lukonde, oyo azali na Lubumbashi wuto le 6 septembre mpo na konje na ye na mbulamayari. Sima ya maponami na ye na bokonzi ya Sena, ayaki kopesa matondo na balobeli ya etuka mpe mpe bato ya ntina mingi notables nionso ya Katanga mpo na kopesa maboko na bango oyo bapesaki ye mpo na candidature na ye.
Caleb makedika
