Mfumu wa ditunga dia Congo Wa mungalata, wakenza luendu lua mudimu lua mêba makumi abidi ni inayi mu tshimenga tshia Oyo tshidi mu kilometre 400 ku Nord kua Brazzaville.Mulombodi wa ditunga Sassou N’guesso wakaya nkayende ku tshipalu tshia ndeke tshia Olombo bua kuakidila muena luendu wende munene Félix Tshisekedi.
Panyima pa dibanemeka dia basalayi ne dibenesha dia bena tshididi ba mu bisumbu bia mbulamatadi, balombodi babidi aba bakayukila minite mikese mu nzubu wa dilala wa mfumu wa ditunga, kumpala kua kusombabu mu mashinyi a muomumue bua kuyabu ku nzubu wa tshitupa tshîpi wa mfumu Tshisekedi.
Dikumbula dia mfumu wa ditunga mu Oyo didi mu tshitupa tshia dikolesha dia malanda a bulunda ne dienza mudimu pankatshi pa matunga abidi aa,
République démocratique du Congo ne République du Congo.
Mu Dia lumingu dia dia 14 ngondo muitanu, balombodi babidi aba bakayukila pa nkayabu, pashishe kuenzabu tshisangilu tshia mudimu ne bena mudimu babu.
Bakayukila bua malu adi atangila matunga abidi aa, buobumue bua matunga abidi aa ne malu a bukubi a ku est kua ditunga dia Congo.
Mulombodi Tshisekedi wakapingana mu Kinshasa mu Dia lumingu mu mapingaja
Shekinah Gloire kabongo
