Tshilombo mufika muditunga dia Bujumbura mu Disambombo edi mu dinda dia lelu bua kubuela mu tshisangilu tshia 11 tshia bamfumu ba matunga badi batua tshiala pa tshipungidi tshia ditalala, bukubi ne dienza mudimu bua ditunga dia Congo ne dia mu tshitupa etshi.
Mu bungi, bamfumu ba matunga dikumi ni isatu anyi baleji mpala babu, sekretere munene wa ONU Antonio Gutteres ne baleji mpala ba AU, ba CIRGL ne ba SADC bakitaba bua kubuela mu tshisangilu etshi tshidi tshianji kutuadija mu Bujumbura mu dinda edi.
Mu mpungilu wa mu Burundi uvuabu babikile kudi mulombodi mupiamupia wa kasumbu aka, mulombodi wa ditunga dia Burundi Evariste Ndayishimiye, tshipatshila tshimue tshia mpungilu eu tshivua tshia kujula kabidi muoyo wa tshipungidi etshi tshivua tshienze bua bantu ba bungi bikale ne ditekemena dia kupingana ne ditalala mu ditunga dia Congo bualu ntshipatshila tshia kumpala tshia ditalala bua kujikija mvita ya bungi idi mienze mashi a bantu katshia ku Mvita mibidi ya buloba bujima ne bua kujikija malu adi akebesha tshikisu ne mvita idi itungunuka mu est wa ditunga dia Congo.
Bidi bimueneka patoke ne: bidimu 10 pashishe, malu akanyanguka bikole pavuabu baleje ne: ditunga dia Rwanda divua dienze mvita ne ditunga dia RDC muinshi mua dibikila dia tshisumbu tshia bena tshinyangu tshia M23.
Tshisangilu tshia dikumi ne umue tshia tshipungidi etshi tshidi tshipetangana ne tshidimu tshia dikumi tshia ditumangana dia mukanda eu, mu dia 24 ngondo muibidi mu 2013 mu Addis Abeba mu Ethiopia.
Diakula dia mulombodi Félix Tshisekedi ku tshibandilu etshi didi ditekemena bikole bualu DRC ke udi mulombodi wa tshipatshila etshi ne kabidi bualu DRC mmusue kuleja ku mêsu kua matunga 13, ONU, AU, CIRGL ne SADEC mushindu udi Rwanda mupangishe malu aa ku diambuluisha dia buluishi bua buloba bua Congo.
Ku luseke lua ditunga dia Congo, kakuena mpata nansha mukese ne: mbimpe kuanji kukonkonona tshipungidi tshia ditalala kumpala kua kuakajilula malu.
DRC mmukumbaje malu adiye muditshiye mu tshipungidi etshi ne ditabuja dionso, eku bakuabu kabayi benze malu ne bululame.
Mu bisangilu ebi, mulombodi wa ditunga Felix Tshisekedi neapeshe mulombodi wende Evariste Ndayishimiye bukokeshi.
Malu a mu tshisangilu etshi neajike dilolo adi ne diumvuija dia ndekelu.
Shekinah Gloire Kabongo
