Patrick Muyaya, ministre wa malu a kumanyishangana ne a bikandakanda, muleji mpala wa mbulamatadi wakenza muyuki ne bamanyishi bua kapia ka mu dinda dia mu dia 24 ngondo muinayi mu kalasa tua lycée Mwanga tua mu tshimenga tshia Dilala mu tshia Kolwezi, tshimenga tshikulu tshia provense wa Lualaba.
Mu muyuki eu, Patrick Muyaya udi ushindikila bantu ne: kakuena muntu nansha umue udi mufue mu kapia kadi kafue mu Lualaba mu dinda edi, bishilangane ne malu adi pa Enternete.
Wakamba ne: « Mulombodi wa bena mbulamatadi, ministre wa malu a munda mu ditunga wakatuambila malu avuaye mupete kudi bamfumu ba provense batuvua kabidi tuyukila nabu. Kakuena muntu udi mufue, kudi bantu bavua bapete disama dikole ne bipupu, kadi bana bavua bapete disama edi mbabatangila, kapia aka nkata ku bukole ku diambuluisha dia kumpanyi ya bungi ivua muaba au ne kabena banji kujingulula tshidiye to », ke muvua Patrick Muyaya muambe mu tshisangilu tshia bamanyishi.
Mu muyuki uvua 7Sur7 mufile ku telefone, ministre wa malu a munda mu ditunga wa Lualaba Déodat kapenda Wa Kapenda wakakula kabidi bua bualu ebu. CD wakamba ne: kapia kakavua kakashipa muntu nansha umue.
« Ndi nnuambila ne: muntu nansha umue ki mmufue to. Lekela kutufikisha mu buloba bua dishima ne lukinu », Deodat Kapenda wakamba.
Tujadika ne: kabena banji kumanya tshivua tshisaka mudilu eu to.
Shekinah Gloire Kabongo
