Tshisekedi mfumu munene wa ditunga Dia Congo udi upesha mbulamatadi matuku muanda mutekete bua kujikija makebulula (Tshipuita tshia balombodi) Mfumu wa ditunga Félix Tshisekedi wakapesha mbulamatadi lumingu lumue bua kufila bijadiki bia malu adibu balonga mu tshilumbu tshia njiwu ya mu buloko bua Makala.
Biakenzeka mu tshisangilu tshia kumpala tshia pa buatshi tshia kasumbu ka balombodi ba Mbulamatadi tshivua tshienzeke mu tshimenga tshia Union africaine mu dia 9 ngondo wa tshiteme
‘nudi ne bua kufila mu lumingu lumue lualua bijadiki bidi biumvuija malu adi enzeka adi mua kuleja tshidi tshifikishe ku bualu ebu. » ke mudi ministre wa malu a tshididi wamba.
Udi wamba kabidi ne: « Dikeba edi didi kabidi ne bua kujadika bujitu ne dinyoka dikumbanyine bua bantu badi bakebesha bimvundu, nansha biobi bikale bia munda anyi bia pambelu ».
Mfumu wa ditunga wakatuma kabidi mulombodi wa malu a munda mua ditunga ne ministre wa malu a dilumbuluisha bua kuenza malu onso adi akengela bua kujikija dijadika malu onso mu buloko bunene bua Makala.
Wakambila kabidi basalayi ne balami ba buloko bua kuikalabu ne lutulu luonso bua kuepuka bualu bua mushindu eu. Mfumu wa ditunga wakalomba kabidi mbulamatadi bua kuanji kuela meji bua mushindu wa kuenza tshibambalu tshia malu a mu buloko tshidi mua kudianjila kumanya ne kuepuka malu mabi a mushindu eu mu matuku atshilualua.
Nunku, Mfumu wa ditunga wakaleja kanyinganyinga kakole bua bantu bavua bafue ne wakafila dianyisha kudi bena mu mêku a bantu bavua bafue bua njiwu ivua mienzeke mu butuku bua dia 1 ngondo wa 9 too ne dia 2 ngondo wa 9 wa 2024, ivua mishipeshe bantu 131.
Kabongo gloire
