Mu dinda dia matuku makuni asatu ngondo wa tshitema, bena tulasa tua Malu a mpetu (ENF) bavua bapete difutu dia mu tshidimu tshia 2010 bakangata mudimu wabu kudi Tshibutshilu tshia mbulamatadi bua kukumbaja tshipatshila tshia Mfumu wa ditunga, S.E.M. Félix Tshisekedi, udi uteka diakalenga dia bena ditunga pa muaba wa kumpala mu malu adiye wenza.
Mu diumvuangana ne tshibidilu tshiende tshia kuikala pabuipi ne bantu ne kubateleja, ministre wa malu a mpetu, LIKUNDE LI-BOTAYI, wakaya kudi bantu bavua bapete difutu edi kumpala kua kuya mu biro biende, kuangataye dîba dia kuyukila nabu buludiludi.
Bavua balue bua kuleja dianyisha diabu kudi Mfumu wa ditunga bua muvuaye muanyishe bua bamone mua kutua tshiala pa mukanda wa Diambuluisha midimu yabu, ne kubenzeja bena mudimu ba tshibutshilu tshia mbulamatadi, ne kujikija lutulu luvuabu nalu munkatshi mua bidimu 14.
Bualu ebu budi buenza mudimu bimpe ne Programe wa malu wa mbulamatadi ((PAG 2024-2028), nangananga bua kuakaja mushindu udi midimu ya mbulamatadi yenzeka bimpe.
Pananku Mu malu onso adi mbulamatadi mua kuenza, udi ne bua kuakaja mushindu udiye wenza mudimu, kumbukila ku mutu too ne kuinshi kua mbulamatadi.
Mfumu wa malu a mpetu, mulamate ku lungenyi lua Mfumu wa ditunga lua kuteka ‘bantu kumpala kua bionso’ wakanyisha dikuatshisha dia Mfumu wa ditunga, ne dia Judith Suminwa mulombodi wa Mbulamatadi, ne Mulombodi munene wa mbulamatadi udi utangila midimu ya mbulamatadi, uvua muanyishe dipangadika divua dipesha bantu bavua bapete difutu edi muanzu wa bena mbulamatadi.
Mu tshisangilu etshi, Ministre wakakankamija bantu bavua bapete difutu edi bua kuenzela ditunga mudimu ne muoyo mujima ne kuluisha malu mabi bu mudi dikosa dia mishiku ne kansungasunga.
Wakabalomba bua kuikala ne bikadilu bimpe bilondeshile mikenji ya bikadilu bimpe bua kuenzela bantu bonso mudimu ne lulamatu.
Tshienzedi etshi tshidi tshileja dijinga dia mbulamatadi dia kutumbisha mudimu wa balongi bapiabapia ne kukolesha mudimu wa mbulamatadi bua diakalenga dia ditunga.
Kabongo
