“Dishintulula dia Mikenji ya Ditunga “Mulongeshi André Mbata muena tshididi dia USN udi ulomba bantu bua disulukana dia tshiji ne udi ulaya ne: mu katupa kîpi emu nebalupulule lungenyi lua bamanyi mu tshilumbu etshi “.
USN -Union sacrée de la Nation-, ku bukokeshi bua mufundi wende wa kashidi, Mulongeshi André Mbata, udi wenza mudimu wa muakuidi wapi kasumbu Aka ka Nsangilu wa mfumu wa Ditunga wakamanyisha dilolo dia lelu, dia 30 ngondo wa tshiteme 2024, dipingana diende mu malu a tshididi.
Mufundi munene wa tshisumbu etshi tshia tshididi wakambila bena bikandakanda bavua badisangishe mu nzubu wende mupiamupia udi mu boulevard du 30 juin mu tshimenga tshia Gombe ne: mu dia 30 ngondo wa tshiteme tshidimu tshionso, nebikale basekelela dibuela dia malu a tshididi dia tshisumbu tshia Union sacrée de la Nation, tshisumbu tshinene tshia tshididi tshidi mu bukalenge.
Mu muyuki eu, mufundi wa mu dîku dia mfumu wa ditunga, Mulongeshi André Mbata, wakakula bua mudimu uvuabu bamupeshe kudi mfumu wa ditunga.
Mu tshikondo tshibi etshi, bua tshilumbu tshikole tshia dikudimuna dia mikenji ya ditunga, Mulongeshi Mbata udi ulomba bantu bonso bua kuikala ne lutulu. Ke bualu kayi udi ulongolola mpungilu mu mbingu ibidi eyi bua kupatula tshibejibeji tshidi tshiakula bua tshilumbu etshi tshidibu bakula kudi bamanyi ba malu a tshididi.
Kadi udi uleja kabidi ne: badi mua kushintulula amue malu mu mikenji ya ditunga. Bua kujadika lungenyi luende, wakafila bilejilu bikese, bu mudi tshia mashintuluka adibu benze mu mikenji ya ditunga dia France matuku mashale aa.
Mulongeshi André Mbata wakakula bua mudimu uvua mfumu wa ditunga Félix Antoine Tshisekedi Tshilombo mumupeshe, wa kuenza bua ditunga dia Congo dikale dimue ne dimone masanka.
Bua malu adi atangila tshikondo ne mukanda wa mikenji ya tshisumbu tshia tshididi etshi, sekretere wa Union Sacrée pour la Nation wakaleja ne: bukokeshi bunene bua bena tshididi ba mu dîku edi ke budi ne bua kuikala bua kumpala.
Mulongeshi André Mbata wakaleja ne: lelu eu kudi bisumbu bia tshididi bipite pa 612 ne bisumbu bia tshididi bitue ku 48. Ne buobumue bua tshijila ebu budi buenda butamba kuvula mu tshitupa tshijima tshia ditunga. Mufundi eu udi wamba ne: bantu badi mua kubuela mu malongolodi a nunku.
Kabongo
