Bu mudibu bamba ne: mbakuatshishe ne bakube bena Tutsi ba mu ditunga dia Congo, Alexis Gisaro udi ushipa Paulo Kagame: ️Bamue bantu badi basue kudivuija baleji mpala ba tshisumbu tshietu nansha mutudi katuyi balombe muntu nansha umue tshintu nansha tshimue.
Alexis Gisaro, ministre wa mbulamatadi, muimikila malu a ditunga.
Pavuaye uyukila mu Dibidi dia matuku dikumi ni inayi ngondo muibidi wa 2023 mu tshisangilu tshia bamanyishi, tshivuabu balongolola kudi Patrick Muyaya, ministre wa malu a diumvuangana ne bikandakanda ne muakuidi wa mbulamatadi, ne mu tshilumbu tshia bujitu, Alexis Gisaro, ministre wa a malu a ditunga, wakandamuna lukonko lua Blaise Zahinda bu mudiye Munyamulenge, bua mushindu uvuaye udiumvua ne malu avuaye ubala bua mvita ivua ditunga dia Rwanda ditekeshe mu ditunga dia RDC.
“Ndi munyamulenge, Tutsi wa mu Congo, ne ndi ne disanka bua mundi Tutsi. Tshiena mua kulomba Nzambi bua angifuke mushindu mukuabu to, bualu mmumanye bua tshinyi uvua mungifuke mushindu au. Tshiena mulombe nansha umue, nansha munyamulenge nansha umue, bua kulomba ditunga kampanda, mu Rwanda, bua kulua kujikija ntatu yetu mu Congo to. Kudi bantu badi basue kuikala baleji mpala ba tshisumbu tshietu, kadi katuena balombe muntu tshintu to. Katuvua babikile ditunga dia Rwanda bua kuluangana mvita ne ditunga dietu to. Tudi tuela meji ne tudi tulekela bena Kongo badi buetu tuetu, bajikija bilumbu bietu munkatshi muetu”, ke muvua Alexis Gisaro muambe.
wela meji ne: dibueja dia bena Rwanda mu malu edi didi dibungamija nsombelu.
Ne kujadika kabidi ne: lelu, bu munyamulenge, bu Tutsi wa mu Congo, ndi ngela meji ne tudi ne balombodi badi ne bujitu ku mutu kua ditunga badi mua kupesha muena Congo yonso muaba wende. Bikalaku bena tshikisu mu ditunga dietu badi bapenda bantu ba bisamba kampanda, mikenji ya ditunga dietu idi ne bua kuakula bua bualu ebu. Tshiena ne disanka bua mvita eyi to, bualu pamutu pa tuetu kukeba mushindu wa kujikija ntatu idi ikadiku, tudi tuyivuija mikole ne tusaka bena Kongo bua kudisombuela. Tshiena nnua diampa edi to.
Alexis Gisaro udi uvuluka ne: ditunga dia RDC divua mu mvita ne Rwanda misangu inayi: AFDL, RDC, CNDP, M23 I ne M23 II. Bikala tshipatshila tshivua tshia kujikija tshilumbu tshia buena tshia FDLR anyi tshilumbu tshia dipanga bululame bua bisamba bikuabu, ndi ngela meji ne: panyima pa bidimu bionso ebi, mvita yonso eyi, tuvua mua kupeta mushindu wa kutshijikija. Kadi lelu malu mmashintuluke bikole, ke muvua ministre wa malu a nshindamenu, midimu ya mbulamatadi ne dibakulula, muambe ne: tshikondo tshikumbane bua Afrike angate mishindu mikuabu pamutu pa mvita.
Gkabongo
