Mukalenge Félix Tshisekedi wakitabusha dilolo dia mu ditanu edi kasumbu ka bena Kongrese wa ditunga dia États-Unis kabadibu balombola kudi John James wa mu tshisumbu tshia ba-Républicain ne Sara Jacobs wa mu tshisumbu tshia ba-Democrate, bonso babidi bikale bena mu komite wa bena ditunga dia États-Unis udi utangila malu a bende.
« Tudi balue bua kuleja dikuatshisha dia ditunga dia États-Unis kudi mbulamatadi wa ditunga dia RDC ne bua kuleja kabidi mushinga udi nawu malanda etu a tshiluilu adi ne bua kuikala makole ne mashindame », ke muvua muena Démocrate Sara Jacobs muambe panyima pa diteleja dia tshilumbu etshi.
⁇ Bintu binene bia mu ditunga dia RDC ki mbintu biabu to, kadi mbena ditunga aba. Ke bua tshinyi tuvua tuakula bua « Bidibu babikila ne: manême a muntu, bukubi ne malu a mpetu bua kuambuluisha bena mu Congo bua kupetabu bintu bia mu ditunga diabu », ke muvua John James, muena mu tshisumbu tshia ba-Républicain udi kabidi mulombodi wa komite wa malu a matunga a bende mu nzubu wa bakokeshi wa mu ditunga dia États-Unis mu tshibambalu tshia malu a matunga a bende.
Muanetu John James wakamba ne: ditunga dia États-Unis d’Amérique didi difila makuta bua kuibaka nzubu minene, bua kuakaja madimi, bua kuibaka biibi ne njila ya kawulu. ⁇ Tudi basue kuambuluisha ditunga dia RDC bua kuibaka bubanji buadi ne kuikala mulombodi munene mu Afrike ku diambuluisha dia malu atudi basue kuibaka pamue ⁇ , yeye kujikija.
Tshisumbu kampanda tshia ba-Républicain ne ba-Democrate ba mu Kongrese wa ditunga dia États-Unis badi benza mudimu mpindieu bua kupatuisha mikenji idi mua kukolesha malanda a bulunda pankatshi pa Washington ne Kinshasa.
Lucy Tamlyn, Ambassadeur wa ditunga dia États-Unis mu RDC uvua pende mu tshisumbu tshia bena États-Unis.
Shekinah Gloire kabongo
