Muleji mpala wa ditunga dia Grande Bretagne mu ditunga dia RDC, Madame Alyson King O.B.E wakenze muyuki munene mudia matuku dikimi ni umue ngondo wa 7 wa 2023 ni ministre munene wa malu a diumvuangana ne a bikandakanda ki yeye mukalengne Patrick Muyaya mu biro biende bia mudimu.
Mu malu avuabu bakonkonone muvua lutatu ne mpunga ya malanda idi pankatshi pa ditunga dia Congo ne Grande-Bretagne.
« Masungula afila mpunga wa kuakaja lumu luimpe lua ditunga dia Congo ku babende. Ke bualu kayi tuvua ne mpunga wa kuyukila bua malu a biamu ne bua malu adi enzeka mu malu adi atangila masungula », ke muvuaye muambe.
Wakamba kabidi tshidi ditunga diende diamba bua mvita ya bena Rwanda idi yenzeka ku est kua ditunga dia Congo.
« Tudi basue ditalala ne bukubi mu ditunga dia Congo. Ke bualu kayi tuvua tuvua bayukila bikole bua bualu ebu ne tuvua balonge ne: kudi anu mushindu wa bena Afrike kujikija ntatu ya bena Afrike. Tudi tuenza muetu muonso bua kuambuluisha bua kupeta malu adi ashala kashidi bilondeshile malu adibu bafunde mu Luanda ne mu Nairobi« .
Nushala kumanya ne Alyson King wakadisangisha mu dia matuku 07 ngondo wa 7 eu ne Mulombodi wa Komision wa masungula mu ditunga (CENI), Denis Kadima Kazadi. Bakayukila kabidi bua malu a manaya adi enzeka mu République démocratique du Congo. Muleji mpala wa ditunga dia Angleterre uvua musanka bua muyuki munene ewu uvua ne bipeta bimpe ne mulombodi wa CENI uvua mumanyishe mushindu wa kulongolola malu bua disungula dia mu dia mumatu makumi abidi ngondo wa dikumi ni ibidi wa 2023.
Wakajadika ne: ditunga diende didi dienza mudimu bua kupingaja ditalala mu tshitupa tshia ku est kua ditunga dia République démocratique du Congo, tshivua bena tshinyangu ba M23 banyenge kudi ditunga dia Rwanda. Mu bukokeshi buende, neenze muende muonso bua malanda a ditunga diende edi ne ditunga dia Congo ikale mimpe.
Shekinah Gloire Kabongo
