Mu tshibilu tshinene tshivua tshienzeke mu tshimenga tshia Kinshasa, kasumbu ka ba kamuna kamba ba muditunga Dia Congo (UNPC) popamue ne (AJEIC) bakapesha Mulongeshi Jean-Marcel Mbikayi Mpanya tshifulu tshia mushinga mukole tshididi babikila ne « Le vrai patriote » ne « diplome de mérite ». Badi bamutumbisha bua mudiye mulamate bikole tshibejibeji tshidi ne malu malenga ne bua mudiye ulombola bansonga ba mu Congo.
Jean-Marie Kasamba, mulombodi wa Kamuna kamba mu tshitupa tshia kinshasa wakenza mudimu ne mpunga eu bua kukankamija ne bua kutungunuka ne mudimu wende.
– « Tudi anu nenu, ne netuikale nenu mu dikumbaja dia bipatshila bienu bua bansonga badi ne bujitu budi ditunga dia RDC dijinga nabu », ke mudiye muambe.
Wakalomba kabidi bamanyishi ba lumu luimpe bua kutungunukabu ne kuenza makebulula bua kufila dianyisha kudi bantu badi bakumbanyine difutu edi.
Mulongeshi Jean-Marcel Mbikayi Mpanya uvua ne kanyinganyinga kakole ne wakaleja dianyisha bua Dipoloma dimupesha. « Muena tshisamba tshia bushuwa »
bidi binkemeshe bikole.Dilamata dietu bansonga ne dia tshisumbu tshia bafundi ba mikanda didi anu « tshintu tshimue tshitudi tuenza bua kuibaka ditunga dietu dinene edi… Ndi ne disanka dia kupeta diplome ne tshifulu etshi. Bualu ebu budi buleja ne: nudi batueyemene. Ndi musue kutuilangana nenu kabidi mu matuku makese adi alua.ke mudiye muambe.
Mulongeshi Mbikayi Mpanya udi ne diplome dia doctorat mu malu a biamu, udi mpindieu mutangidi wa Institut supérieur de statistiques de Kinshasa (ISS/Kin). Wakenza kabidi mudimu bu sekretere munene wa malu a mbulamatadi ne wakalongesha mu iniversite ya bungi.
Difutu edi didi dipeteka ku ndekelu kua mudimu wende wa dilongesha bantu ne wa dikankamija tshiamu tshia ngumu tshia budikadidi ne tshia bujitu mu ditunga dia Congo wa mungalata .
Kabongo gloire
