Béatrice hôtel uvua muakidile Tshibilu tshinene etshi tshivua tshituadije mu dia matuku dikumi ngondo wa tshitema kudi Didier M’Pambia, ministre wa mudimu wa dikumbula benyi.
Tshisangilu etshi Tshivua ne tshiena bualu « Bua kuakaja mudimu wa dikumbula benyi » Mu dituku dibidi edi, ministre Muyaya uvua munkatshi mua bantu bavua bakula bua dienza dia mudimu wa kutumbisha ditunga dia Congo wa mungalata pamue ne bena mudimu bende ba mu tshibambalu tshia malu a bilele, a biamu ne a bumpianyi; ba mu tshibambalu tshia mikanda, tshia ngumu ne tshia Enternete; ne ba mu tshibambalu tshia midimu ya bianza .
» Tshimfuanyi tshia ditunga tshidi tshibanga ne mushindu utudi tudimona kumpala kua bakuabu. Bua dikumbula dia benyi, katuena anu ne bua kumona benyi badi balua kutangila ditunga dietu, kadi tudi ne bua kumona benyi ba mu ditunga dietu, bualu ditunga dietu didi ne tshipapu tshia buloba bujima. «
Udi utungunuka wamba ne: « Muena Congo yonso udi ne mudimu wa kuenza buase tshimfuanyi tshia ditunga tshikala tshilenga. Tshimfuanyi etshi ki ntshia mushindu udi bantu ba pambelu bamona ditunga dia Congo to, kadi ntshia mushindu udi bena mu Congo bamona tshimfuanyi tshia ditunga diabu ne mushindu udibu benza bua kutangalaja tshimfuanyi etshi.
Bisangilu ebi biakatupesha mpunga wa kupetangana ngenyi ne bantu ba mu provense popamue ne bantu badi benza mudimu wa dikumbula benyi bua kuenza « Bible » wikala mua kutuambuluisha bua kukumbajila dijinga dietu dia kuikala tshimfuanyi tshia ditunga dietu. Tuvua ne disanka dia kuambuluisha mu mudimu eu.
Gloire Kabongo
