RDC: Patrick Muyaya mupeta dipa dia pabuadi kudi bena mudimu bende
Ngamba-malu ,mulombodi Wa Malu à bikandakanda Patrick Muyaya wakapeta dibenesha dia bungi kudi bena mudimu bende mu dinda dia lelu mu dia matuku abidi ni muanda mutekete ngondo muisatu 2023 kunyima kua bamane kumuakidila kudi mfumu wa ditunga Félix Antoine Tshisekedi bua mudiye mumupingaje mu mudimu wende mu Ditanu dia matuku abidi ni anayi ngondo muisatu.
Panyima pa dibenesha edi dia disanka, Nicolas Lianza, mulombodi wa mudimu wa ministre wakela muela tuasakidila mu dîna dia bena mudimu bonso.
» Mukalenge. Tudi tuela Nzambi tuasakidila bua mushindu unudi basombe muaba eu, ke bualu kayi tudi tujikija disambila edi. Tudi tuela mulombodi wa ditunga, Félix Tshisekedi tuasakidila bua ditabuja didiye mutupeshe ni mukupingaje mukuasa webe Kabiena bimueneka patoke to, kadi ndiakalenga dietu mutudi tuenza nebe mudimu.
Bua kuleja dilama dia mbulamatadi wa Sama Lukonde 2, Nicolas Lianza wakafila mu dîna dia kabinete, lupingu lua mitshi ludi luleja muntu wa meji wenza mudimu mu musokoko. Ke tshidi tshileja ngikadilu ya ministre Muyaya.
Wakasakidila ne: « Tudi basue kukujadikila kabidi dijinga dietu dia kuenzela ditunga mudimu ku diambuluisha dia bulombodi buebe ne mu mushindu wa muomumue, wewe neutungunuke ne kuenzela ditunga mudimu ku bulombodi bua ministre munene Jean-Michel Sama Lukonde Kyenge ne ku bulombodi bua mfumu wa ditunga Félix Antoine Tshisekedi Tshilombo ».
Muena mudimu Patrick Muyaya Katembwe wakakema bua mushindu uvua tshisumbu etshi tshienza malu ku budisuile, ne wakaleja muvuaye ne disanka pavuaye wakula _. « Kena anu bualu butudi bapete to, kadi Nzambi mmutufuile luse. Tuvua benze mudimu bimpe ne tudi ne ditabuja kudi Nzambi, kudi Mulombodi wa ditunga ne kudi ministre munene bua mudimu utuvua batuadije. Mudimu utudi tuenza muaba eu (nuenu ne meme) mmusankishibue, kadi ndi ngela meji ne: mudimu eu udi ne bua kulengejibua ne kusankishibua bikole ».
« Nunku, tuasakidila bikole bua mudimu wenu ne lutulu luenu. Ndi musue kunulomba bua nuenze malu a bungi bua tuikale misangu yonso bakumbanyine dieyemena dia mulombodi wa ditunga, dia tshisumbu ne dia bena Kongo bonso badi batulonda.
Diakabi, katuvua ne dîba dia kusanka to. Bualu ke tshingoma tshia kumpala tshituvua benze natshi mudimu. Ndi ngela meji ne: nuenu bonso nudi bamanye mvita itudi tuluangana. Ntshibangidilu tshipiatshipia ne tuetu bonso, tuvua ne bua kutungunuka ne kuakaja muaba uvua bilema ne kumona ne: ntshibangidilu tshipiatshipia tshidi tshitusaka bua kuikala kabidi ne dijinga ne kuenza ne muetu muonso bua kuambuluisha ditunga.
Tuasakidila bua dipa. Ndi ngela meji ne: nuenu bonso nudi bumvue tshimanyinu tshia bualu ebu ».
Shekinah Gloire Kabongo
