Mu dienza dia tshivulukilu tshia ngondo wa bakaji mu ditunga dia République démocratique du Congo, ministre wa malu a ngumu ne muakuidi wa mbulamatadi, Patrick MUYAYA KATEMBWE, wakadisangisha ne balongi ba bakaji ba mu kalasa ka Mepco Révérend Kim, mu tshimenga tshia Kintambo, mu dia 11 ngondo muisatu mu tshidimu tshia 2025, mu nzubu wa kalasa aka.
Tshibilu etshi tshivua ne tshiena-bualu tshia mu tshidimu tshia Dituku dia bukenji bua bakaji mu ditunga dia République démocratique du Congo tshia ne: « Mukaji wa mu ditunga dia Congo udi ku mutu kua bionso bitudi basue kuenza ».
Muakuidi wa malu a dimanyishangana wakambila bana ba bakaji 100 bavua mu nzubu eu bua muaba udi nawu bantu bakaji mu ditunga dia Congo, nangananga katshia Mfumu wa ditunga Félix Antoine TSHISEKEDI TSHILOMBO mulue kukokesha. Pashishe, wakatela mêna a bantu bakaji badibu babandishe mu ditunga dia République démocratique du Congo, bu mudi: wa kumpala Judith SUMINWA, ministre wa malu a ditunga ministre wa dilongesha ditunga ne buena ditunga bupiabupia Raissa MALU, ministre wa malu a ditunga ministre wa malu a bende, buobumue bua pa buloba bujima ne francophonie Thérèse KAYIKWAMBA, ministre wa bansonga ne dikola dia bena ditunga Noella AYEGANAGATO ne mulombodi wa Banque centrale de la Congo, Marie-France MALANGU KABEDI.
Pakadi Mfumu wa ditunga mulombodi wa Bulongolodi bua matunga a mu Afrike mu tshidimu tshia 2020, bantu ba mu Afrike bonso bavua bamubikila ne: Mulombodi wa Bukole bua Balume bua didifila diende bua kutungunuja ne kukuba bana ba bakaji ne bakaji. Ndi ngela meji ne dilongesha diudi upeta muaba eu kudi Muakuidi Kim, udi ne mushindu wa kudiundisha mpindieu ne kulua mukaji munene bu mumvua muambe kumpala eku ne kuambuluisha bua dikumbana dia ditunga dietu, yeye kuamba. Kutungunuka ne: Ndi musue kuamba ne: mudimu eu uvua mulongolola pamue kudi balombodi ba tshilongelu etshi, ba Résilience RSE ne bakaji ba mu kabinete ka ministre wa malu a ngumu. Bivua bualu bua disanka bua meme kulua mu ngondo eu wa bakaji, bua kupeta mushindu wa kuyukila ne bansongakaji ba mu tshilongelu etshi tshia mushinga mukole. Katuvua anu tuakula bua muaba udi nawu bantu bakaji to, kadi tuvua kabidi tuakula bua kampanye ka Congolais Téléma .
Bualu nansha mu miaku mipepele, bana betu badi mua kumvua malu adi enzeka ku Est kua ditunga. Mmalu atuvua babambile. Bualu tuvua basombe mu ditunga dia buume buimpe. Tshikondo atshi, Mfumu wa ditunga nkayende ke uvua ulombola mudimu wa diamba ne wa dienza malu bua kupeta bukenji bua bantu bakaji.
Bualu lelu tudi ne mbulamatadi mulombola kudi muntu mukaji bua musangu wa kumpala, ne tudi ne mudimu wa malu a bende, banke munene ne midimu ya bungi ya mbulamatadi. Bua tshinyi? Bualu udi ne bua kuikala tshilejilu tshimpe. Ndi ngela meji ne: bualu bua se: Mfumu wa ditunga uvua muenze bualu ebu mushindu eu. Bualu ebu budi buambuluisha bansongakaji badibu balela lelu bua kuikalabu ne dijinga dia bungi bua matuku atshilualua tuikale ne bakaji badi ne bukenji bua muomumue ne balume bua kuambuluisha ditunga dietu bua kudiunda.
SK
