RDC: Kasumbu ka bukubi ka ONU kafika mu Nord Kivu.
Panyima pa bamane kubakidila kudi mulombodi wa ditunga dia République démocratique du Congo mu dia matuku dikumi ngondo muisatu eu, kasumbu ka bukubi ka matunga masanga kafika mu Nord-Kivu mu Disambombo dia 11 ngondo muisatu, mu mudimu wabu muibidi, ne balombodi ba bungi ba muaba au, kusangisha ne nguvena wa basalayi Constant Ndima.uvua muya kuakidila bantu aba. Tshipatshila tshia dikumbula edi ntshia kukonkonona nsombelu wa bukubi ne wa bukua bantu mu provense wa Nord-Kivu ne kumanya nsombelu wa mudimu udi nawu MONUSCO wenza mu tshitupa etshi tshidibu bakuata kudi mvita ya bena Rwanda.
Bua kumanya. Ntshinyi tshidi bantu binunu ne binunu badi banyeme tshikisu tshia M23 ne basombele miaba mishilashilangane pabuipi ne Goma mua kutekemena?
Nicolas de Rivière, mumanyishi wa ditunga dia France mu tshisangilu tshia bukubi tshia matunga masanga, udi wela meji ne: mbulamatadi wa ditunga dia Congo udi ne bua kukumbaja majitu ende ne udi uleja ne: matunga masanga kaena mua kuenza malu onso to.
_ » _Ndi musue kujadika bualu ebu, bulongolodi bua matunga masanga kabena mua kuenza malu onso, kabena ne bujitu bua malu onso, bamfumu ba ditunga dia congo badi pabu ne bujitu, biluilu bia ditunga dia congo bidi pabu ku nzubu munene mu ditunga diabu. Ke bualu kayi badi ne bujitu, bulongolodi bua matunga masanga budi muaba eu bua kuambuluisha, kakuena diandamuna dia majimbu nasha to bulongolodi bua matunga masanga kabuena mua kujikija ntatu nkayayi to_ « , ke muvua Nicolas de Rivière muambe.
Udi utungunuka wamba ne: « Bidi bimueneka patoke ne: tudi ni dijinga dia diyukidilangana dia malu bumudi, disombeshangana dia malu a bukubi » kadi udi usakidila ne: « kanutekemenyi bulongolodi bua matunga masanga bua kujikija malu mu mushindu wa mu tshishima ne diakamue mu muaba wa bakokeshi ba mu Congo ». Umvuija tshiena-bualu kampanda tshia mu bikandakanda mu Dia lumingu dia 12 ngondo muisatu.
Bilondeshile ndandanda wa ndekelu wa dijika dia mvita uvua mulombodi wa ditunga dia Angola mumanyishe mu Luanda mu dia 3 ngondo muisatu, bavua ne bua kujikija mvita mu tshitupa tshionso tshia ku est kua ditunga dia Congo mu Dibidi.
Tudi basue kujadika ne: mu diumvuangana ne mapangadika adibu bangate kudi bisumbu bikese bia ku mutu kua buloba bua ditalala ne bukubi mu République démocratique du Congo, bilondeshile majitu abu bu balombodi mu luendu lua Luanda ne panyima pa diyukidilangana ne bamfumu ba République démocratique du Congo, République d’Angola neatume kasumbu kampanda ka mu dikuatshisha dia basalayi ba Angola bua kulama ditalala. Mudimu munene wa kasumbu aka neikale wa kulama miaba idibu bafunda malu a M23 ne kukuba bena mu kasumbu ka dienza makebulula. Ke mudibu baleje mu luapolo luvuabu bapatule kudi mulombodi wa ditunga dia Angola mu Disambombo dia 11 ngondo muisatu.
Shekinah Gloire Kabongo.
